ଉଗ୍ର ରୂପ ନେଲା ଆମେରିକା-ଇରାନ ବିବାଦ, ବିଶ୍ୱ ବଜାରରେ ତେଲ ଦର ଆକାଶଛୁଆଁ

ପ୍ରିଜମ୍ ନ୍ୟୁଜ୍: ଏସିଆ ବା ମଧ୍ୟପ୍ରାଚ୍ୟରେ ଉପୁଜିଥିବା ଭୟଙ୍କର ସାମରିକ ଉତ୍ତେଜନା ଯୋଗୁଁ ସମଗ୍ର ବିଶ୍ୱର ଶକ୍ତି ବଜାର ଏବେ ଅସ୍ଥିର ହୋଇପଡ଼ିଛି। ଆମେରିକା ଏବଂ ଇରାନ ମଧ୍ୟରେ ସୃଷ୍ଟି ହୋଇଥିବା ପ୍ରତ୍ୟକ୍ଷ ଯୁଦ୍ଧ ପରିସ୍ଥିତି କାରଣରୁ ଆନ୍ତର୍ଜାତୀୟ ବଜାରରେ ଅଶୋଧିତ ତୈଳ ଦରରେ ଏକ ବଡ଼ ଧରଣର ବିସ୍ଫୋରଣ ଦେଖିବାକୁ ମିଳିଛି। ଗତ ବୁଧବାର ଦିନ ତେଲ ଦରରେ ହଠାତ ୭% ରୁ ୮% ର ଅଭୂତପୂର୍ବ ବୃଦ୍ଧି ଘଟିବା ପରେ, ବିଶ୍ୱ ବଜାରରେ ବ୍ରେଣ୍ଟ କ୍ରୁଡ୍ ବ୍ୟାରେଲ ପିଛା ୮୭ ରୁ ୯୦ ମଧ୍ୟରେ କାରବାର କରୁଛି।ଇତିହାସର ଏହି ସବୁଠାରୁ ବଡ଼ ତୈଳ ଯୋଗାଣ ସଙ୍କଟ ପଛରେ ୪ଟି ମୁଖ୍ୟ କାରଣ ରହିଛି:

ପ୍ରଥମତଃ, ଆମେରିକା ଓ ଇରାନ ମଧ୍ୟରେ ବଢ଼ୁଥିବା ସାମରିକ ଆକ୍ରମଣ। ଦ୍ୱିତୀୟତଃ, ବିଶ୍ୱର ଗୁରୁତ୍ୱପୂର୍ଣ୍ଣ ତୈଳ ପରିବହନ ମାର୍ଗ ହରମୁଜ ପ୍ରଣାଳୀରେ ବିଘ୍ନ ଆଶଙ୍କା। ତୃତୀୟରେ, ଲୋହିତ ସାଗରରେ ଜାହାଜ ଚଳାଚଳ ଉପରେ ବିପଦ। ଚତୁର୍ଥରେ, ଆମେରିକାରେ ଅଶୋଧିତ ତୈଳ ଭଣ୍ଡାର କମିବାରୁ ଯୋଗାଣ ଉପରେ ଚାପ ବଢ଼ିଛି।ବିଶ୍ୱର ବଡ଼ ଅଂଶର ତୈଳ ପରିବହନ ହରମୁଜ ପ୍ରଣାଳୀ ଦେଇ ହୋଇଥାଏ। ଏହି ଅଞ୍ଚଳରେ ସଂଘର୍ଷ ବଢ଼ିବାରୁ ତୈଳ ଟ୍ୟାଙ୍କର ଚଳାଚଳ ପ୍ରଭାବିତ ହେଉଛି। ଏହା ସହିତ ଲୋହିତ ସାଗରରେ ମଧ୍ୟ ଡ୍ରୋନ୍ ଓ କ୍ଷେପଣାସ୍ତ୍ର ଆକ୍ରମଣ ଯୋଗୁଁ ଯୋଗାଣ ଶୃଙ୍ଖଳା ଉପରେ ଚାପ ବଢ଼ିଛି।

ଭାରତ ନିଜର ପ୍ରାୟ ୮୦ରୁ ୮୫ ପ୍ରତିଶତ ଅଶୋଧିତ ତୈଳ ବିଦେଶରୁ ଆମଦାନୀ କରେ। ତେଣୁ ବିଶ୍ୱ ବଜାରରେ ଦର ବଢ଼ିଲେ ଭାରତରେ ପେଟ୍ରୋଲ, ଡିଜେଲ, ପରିବହନ ଖର୍ଚ୍ଚ ଏବଂ ଦୈନନ୍ଦିନ ସାମଗ୍ରୀର ଦାମ ଉପରେ ପ୍ରଭାବ ପଡ଼ିପାରେ। ବିଶେଷଜ୍ଞଙ୍କ ଆଶଙ୍କା, ସଂଘର୍ଷ ଜାରି ରହିଲେ ତେଲ ଦର ବ୍ୟାରେଲ ପିଛା ୧୩୦ରୁ ୧୫୦ ଡଲାର ପର୍ଯ୍ୟନ୍ତ ପହଞ୍ଚିପାରେ।ମଧ୍ୟପ୍ରାଚ୍ୟରେ ସଂଘର୍ଷ ଥମିବ ନା ଆହୁରି ବଢ଼ିବ, ତାହା ଉପରେ ନିର୍ଭର କରିବ ବିଶ୍ୱ ତୈଳ ବଜାରର ଭବିଷ୍ୟତ। ତେବେ ଯଦି ଏହି ଉତ୍ତେଜନା ଦୀର୍ଘ ସମୟ ଧରି ଜାରି ରହେ, ତାହାର ସିଧା ପ୍ରଭାବ ଭାରତୀୟ ବଜାର ଓ ସାଧାରଣ ଖାଉଟିଙ୍କ ପକେଟ୍ ଉପରେ ପଡ଼ିପାରେ।